Forcat izraelite kanë vrarë një infermiere palestineze këtë të premte, teksa ajo përpiqej të ndihmonte një protestues të plagosur në kufirin mes Rripit të Gazës dhe vendit hebre.
Reuters bëri të ditur se vdekja e Razan Al-Najar e çon në 119 numrin e palestinezëve të vrarë gjatë demonstratave të përjavshme të nisur prej 30 marsit në Rripin e Gazës, një enklavë palestineze e kontrolluar nga grupi islamik i Hamasit, e prej kohësh subjekt i embargove dhe bllokadave nga Izraeli e Egjipti.
Najar, një infermiere vullnetare 21-vjeçare, u qëllua teksa vraponte drejt gardheve kufitare, në lindje të qytetit jugor të Gazës, Khan Younis, në përpjekje për t’i dhënë ndihmë një të plagosuri.
Edhe pse e veshur me uniformë të bardhë dhe “pavarësisht se ngriti duart qartësisht lart”, sipas një dëshmitari, ushtarët izraelitë qëlluan ndaj saj duke e goditur në gjoks.
Zyrtarët izraelitë kanë thënë më parë se snajperët e ushtrisë kanë në shënjestër vetëm njerëzit që paraqesin kërcënim, por që plumbat ndonjëherë mund të godasin gabimisht edhe personat që janë duke kaluar nëpër rrugë.
Ekipi mjekësorë i Gazës tha se të paktën 100 palestinezë u plagosën me armë zjarri gjatë demonstratave masive të së premtes.
