Jo të gjitha trupat e pengjeve të vrarë do t’i kthehen menjëherë Izraelit, pavarësisht afatit 72-orësh të parashikuar në marrëveshjen e armëpushimit me Hamasin.
Lajmi është konfirmuar nga Gal Hirsch, koordinatori izraelit për çështjen e pengjeve, në një mesazh dërguar familjeve mbrëmjen e djeshme, 11 tetor.
Sipas CNN, Hirsch u shpreh se procesi i lirimit të pengjeve që janë ende gjallë pritet të nisë të hënën në mëngjes, 13 tetor, ndërsa mbetjet e atyre që kanë humbur jetën do të transferohen më vonë. Ai theksoi se jo të gjitha trupat do të kthehen menjëherë.
“Vlerësojmë se procesi i lirimit të të dashurve tuaj, pengjeve tona, do të nisë të hënën në mëngjes. Parashikohet që edhe trupat e pengjeve të vdekur të kthehen, por jo të gjithë menjëherë”, tha Hirsch.
Më tej, ai shtoi se Izraeli do të bashkëpunojë me task-forcën ndërkombëtare për të gjetur dhe kthyer trupat e të gjithë pengjeve të vrarë.
“Ne kërkojmë dhe presim angazhim 100% nga Hamasi, me mbështetjen e task-forcës ndërkombëtare, për ta përfunduar këtë mision dhe për t’i kthyer trupat në Izrael për një varrim të denjë”, paralajmëroi ai.
Sipas burimeve izraelite, nga 48 pengjet që ndodhen ende në duart e Hamasit, rreth 20 besohet të jenë gjallë.
