Danimarka ka njoftuar blerjen e 16 avionëve të rinj luftarakë amerikanë F-35, si pjesë e një plani për të forcuar mbrojtjen e hapësirës ajrore. Vendimi vjen dy javë pas disa shkeljeve të hapësirës ajrore nga dronë të paidentifikuar.
Ministri i Mbrojtjes, Troels Lund Poulsen, deklaroi se “është arritur një marrëveshje politike për të blerë edhe 16 avionë F-35, në mënyrë që vendi të ketë më shumë njësi të gatshme për operacione në të ardhmen”.
Kostoja e kësaj blerjeje kap shifrën e 29 miliardë koronave daneze (rreth 3,88 miliardë euro), duke e çuar në 43 numrin total të avionëve F-35 që do të zotërojë Danimarka.
Shefi i Shtabit të Përgjithshëm të Forcave të Armatosura, Michael Hyldgaard, e cilësoi këtë si një hap strategjik për mbrojtjen kombëtare dhe për aleancën me NATO-n.
“Me këta avionë, kapaciteti ynë luftarak forcohet ndjeshëm dhe rritet aftësia parandaluese e vendit”, tha ai.
Në të njëjtën kohë, Danimarka ka vendosur të investojë edhe 2,1 miliardë korona (rreth 281 milionë euro) në sisteme kundër-dronësh për të shmangur ndërhyrjet ajrore nga mjete të paidentifikuara.
