Nga Elton Laska
Tirana ndodhet në një udhëkryq të madh moral e qytetar. Prej vitesh qyteti është kthyer në laboratorin më brutal të betonit, klientelizmit dhe propagandës. Ndërsa kullat ngrihen, hapësirat publike zhduken. Ndërsa reklamat e pushtetit flasin për zhvillim, qytetari ndjen mungesë fryme, mungesë besimi, mungesë përfaqësimi.
Në këtë realitet të ngulfatur, Florjan Binaj jam i bindur që përfaqëson diçka krejt tjetër. Një zë qytetar, të pastër, të paanshëm.
Pavarësisht se Gjykata Kushtetuese e pezulloj sot dekretin e Presidentit të Rrepublikës për të shpallur zgjedhjet e 9 Nëntorit, në gjykimin tim, kjo vetëm sa i jep avantazh në kohë kandidatit të pavarur Florjan Binaj.
Flori nuk vjen si prodhim i pazareve e tenderave politikë, por vjen nga arti, nga qytetaria aktive, nga ndërgjegjja e lirë (është i diplomuar edhe si arkitekt). E mbase kjo, mund të jetë dhe pika që do i japë më shumë besim në një qytet që është lodhur nga mashtrimi dhe fasadat.
Në një kohë kur politika është kthyer në profesion të horrave, Flori është dëshmi se ndershmëria mund të jetë ende forcë reale në politikë.
Flori është kandidati i njerëzve që nuk ndihen të përfaqësuar nga partitë, por që duan ndryshim pa urrejtje, pa përçarje.
Kam marrë pjesë si aktivist bashkë me Florin në disa protesta, por më të freskët kam protestën e thirrur nga vet ai, vitin e kaluar përballë Gjykatës Kushtetuese për të kërkuar rrëzimin e ligjit që tarifonte padrejtësisht profesionet e lira. Në këtë protestë si asnjëherë më parë, folen përfaqësues nga i gjithë spektri opozitar, përfshirë Lëvizja Bashkë.
Kjo e kthen kandidatin në një mundësi unike për opozitën, një figurë që mund të bashkojë energjitë e ndara, që mund të sjellë në një front të vetëm gjithë ata që duan t’i japin fund modelit të betonit dhe arrogancës. Pyetja që ngrihet është: Çfarë e pengon sot drejtuesin e Lëvizjes Bashkë që të tërhiqet nga kandidimi dhe t’i bashkohet energjisë qytetare për të rrëzuar modelin Rama-Veliaj?!
Kampi opozitar duhet ta kuptojë, betonit nuk i dilet përballë vetëm me retorikë politike, por me moral, frymë dhe njerëz që gëzojnë besim real tek qytetarët.
Mbështetja e Florjan Binajt nuk është thjesht një zgjedhje elektorale, por një test moral për opozitën (e vjetër dhe të re). A do të vazhdojë të mbështetet te figurat e vjetra, të konsumuar, apo do të ketë guximin të besojë te energjia e re, te njerëzit që vijnë nga jashtë sistemit? A do të prevaloje egoja personale mbi interesat e qytetit? Le ta ndjekim deri në fund, për të parë nëse ata që deklarohen kundër betonizimit do ta mbajnë fjalën, apo sërish nuk do të arrijnë të dalin përtej kufijve ideologjikë që i mbajnë peng.
Nëse opozita kërkon të fitojë besimin, ajo duhet të tregojë se interesi publik vlen më shumë se interesat partiake, se Tirana vlen më shumë se partia.
Dhe, në kushtet ku jemi, Florjan Binaj është mënyra më e sinqertë për ta provuar këtë.
