Korça dhe e gjithë skena muzikore shqiptare janë në zi pas ndarjes nga jeta të këngëtarit dhe kompozitorit të njohur Nonda Kajno, në moshën 80-vjeçare.
I lindur më 18 gusht 1945 në Korçë, Kajno u formua artistikisht në Liceun Artistik “Tefta Tashko Koço”, duke u bërë një nga zërat dhe krijuesit më përfaqësues të muzikës qytetare korçare.
Ai nisi karrierën në aktivitetet kulturore lokale, si interpretues i serenatave dhe këngës qytetare, për të vijuar më pas me kompozime origjinale që u bënë pjesë e pandashme e traditës muzikore. Ndër më të njohurat janë këngët “Për ty o Korça ime”, “Ah sa të kam dashur” dhe “Pra zgjohu vajza ime”.
Nonda Kajno ishte ndër kantautorët më të njohur të serenatës korçare dhe i pari që, në vitet ’70, krijoi grupin e parë muzikor me tre kitara, një risi që më pas u përhap edhe në Tiranë.
