Keni ëndërruar gjithmonë të jetoni në një vend të qetë dhe piktoresk? Atëherë vendi më i mirë ku mund të shkoni është Vermonti… madje do të merrni edhe para.
Shteti amerikan ka kaluar një ligj të ri, që do t’i paguajë punonjësit në mënyrë që të shkojnë të jetojnë atje dhe të punojnë në distancë. Sipas asaj që shkruan amerikania CNN, ligji në fjalë u nënshkrua të mërkurën nga Guvernatori Phil Scott.
Punonjësit e kualifikuar mund të përfitojnë mbi 5 mijë dollarë në vit dhe të mos e kalojnë 10 mijë dollarëshin në 2 vjet, përmes programit të ri të grantit për punëtorët që punojnë në distancë.
Paratë mund të përdoren për shpenzimet, përfshirë ato të zhvendosjes, pajisje të nevojshme kompjuterike dhe programet e caktuara, aksesin në internet etj.
Vermonti ka një popullsi të vogël dhe të plakur. “Jemi të ndërgjegjshëm që na duhet që të rekrutojmë njerëz dhe kjo është një përpjekje”, shpjegoi për CNN Komisioneria e Zhvillimit në Vermont, Joan Goldstein.
Ajo tha se zyra e saj ka marrë menjëherë aplikime nga punonjës të interesuar.
Kandidatët duhet të jenë të punësuar me kohë të plotë në një biznes jashtë shtetit, të punojë nga shtëpia ose në një ambient punë në Vermont dhe të bëhen banorë të përhershëm në këtë shtet deri më 1 Janar 2019, ose pas kësaj date.
Punonjësit e interesuar duhet të veprojnë shpejt, pasi fondi i parashikuar do t’i dorëzohet personave të parë që mbërrijnë në këtë shtet dhe do të jetë i limituar.
Për vitin 2019-të grantet totale nuk mund t’i tejkalojnë 125 mijë dollarët. Shifra rritet në 2020-ën, në 250 mijë dollarë, për t’u ulur sërish në 2021, në 125 mijë dollarë.
