Tarifat doganore të SHBA-së, ndaj aluminit dhe çelikut kanë hyrë në fuqi, ndonëse kritikat ndaj administratës Trump vijojnë të intensifikohen.
Ministri amerikan i Tregtisë, Wilbur Ross njoftoi se: “Duke nisur nga kjo e premte importet e çelikut nga BE-ja, por edhe nga Kanadaja dhe Meksika do të taksohen me dogana në masën 25 përqind, për importet e aluminit taksa do të jetë dhjetë përqind. Përjashtimi nga ky rregull për taksat doganore të vendosura në mars, i cili vlente deri tani për këto tri vende, shfuqizohet më 1 qershor 2018”.
Kritikave të taksës së importit për çelikun dhe aluminin nga BE, i është bashkuar edhe Kanadaja dhe Meksika.
Udhëheqësit e vendeve të prekura reaguan me zemërim, duke vendosur po të njëjtat tarifa ndaj SHBA-së, duke filluar nga çeliku deri te çantat e gjumit dhe stilolapsat.
Presidenti francez Emmanuel Macron, në një telefonatë me Trump, i tha këtij të fundit se lëvizja e SHBA-së ishte “e paligjshme”.
Macron gjithashtu i komunikoi se: “BE do t’i përgjigjet në mënyrë të vendosur dhe proporcionale SHBA-së”.
Presidenti francez normalisht gëzon një marrëdhënie të mirë me homologun e tij amerikan.
Teksa Trump i ka justifikuar tarifat, të cilat hynë në fuqi këtë të premte, duke argumentuar se prodhuesit e çelikut dhe aluminit të SHBA-së janë kryesor për sigurinë kombëtare dhe janë kërcënuar nga një dobësim global i furnizimeve.
Bernd Lange, kryetar i komitetit të tregtisë ndërkombëtare të Parlamentit Evropian, tha se tarifat e SHBA ishin të paligjshme.
Ai shpreson se një luftë tregtare mund të shmanget, por paralajmëroi se veprimi i Trump demonstroi se presidenti “nuk ishte i gatshëm t’i përmbahej rregullave”.
