Aleatët e Shteteve të Bashkuara i janë përgjigjur me të njëjtën monedhë vendosjes së tarifave mbi importet e çelikut dhe aluminit, duke taksuar këto dhe një sërë produktesh të tjera amerikane. Bashkimi Europian, Kanadaja dhe Meksika kanë deklaruar se do ta çojnë çështjen deri në Organizatën Botërore të Tregtisë, si një nga masat hakmarrëse kundër vendimit të Uashingtonit që tashmë ka hyrë në fuqi.
Teksa tarifat e Shteteve të Bashkuara mbi importet e çelikut dhe aluminit kanë hyrë zyrtarisht në fuqi këtë të premte, kori i kritikave ndaj lëvizjes së administratës Trump vjen duke u forcuar.
Udhëheqësit e Kanadasë dhe Meksikës kanë reaguar ashpër, duke urdhëruar vendosjen e tarifave ndaj Shteteve të Bashkuara, për produkte që variojnë nga çeliku deri tek stilolapsat.
Edhe Bashkimi Europian ka premtuar vendosjen e tarifave ndaj produkteve amerikane ikonë si Harley Davidson dhe uiski, krahas çelikut dhe aluminit. Megjithatë Komisioni Europian ende nuk ka dalë me një plan konkret.
Brukseli zyrtar gjithashtu ka paralajmëruar se do ta çojë çështjen deri në Organizatën Botërore të Tregtisë, së bashku me Kanadanë e Meksikën, për të aktivizuar mekanizmin e zgjidhjes së mosmarrëveshjeve.
Vendosja e tarifave ka rigjallëruar frikën e investitorëve për një luftë globale tregtare. Presidenti francez Emmanuel Macron kujtoi periudhën para Luftës së Dytë Botërore. “Nacionalizmi ekonomik çon në luftë.
Kjo është pikërisht ajo që ndodhi në vitet ’30,” u shpreh kreu i Elizesë.
