Moti ka bërë një kthesë të fortë që prej ditës së djeshme. Ditët me diell ia kanë lënë vendin reshjeve të shiut e dëborës dhe temperaturave të ulëta.
Ashtu si në disa zona malore në verilindje të vendit edhe Malësia e Krujës është zgjuar sot nën petkun e bardhë të dëborës.
Reshjet e dëborës të rëna gjatë natës në lartësitë 1000 m mbi nivelin e detit ka bërë që trashësia e saj në disa fshatra si Shkreta, Bruz Mali apo Qafshtama të shkojë në disa centimetra.
Edhe Malësia e Dibrës dhe Bulqizës është përfshirë nga reshjet e dëborës. Trashësia në zonat e larta si Lura, Selishta, Kalaja e Dodës kalon mbi 20 cm.
Aktualisht nuk raportohet për bllokime të qarkullimit, megjithatë drejtuesit e automjeteve këshillohen të tregojnë kujdes për shkak të lagështisë dhe prezencës së dëborës.
