Adriatik Lapaj i “SHqipëria Bëhet” refuzon bashkëpunimin me forcat e tjera opozita, të kryesuara nga PD, për të dalë me një kandidat të vetëm për zgjedhjet e parakohshme lokale për Bashkinë e Tiranës.
“Nuk dua të jem ai që prish festën! Por mënyra si po procedohet nuk është e duhur, po procedohet përmes një kandidati partiak. Po flasim për një qytet me afro 700 mijë votues, 600 e ca mijë, qyteti më i madh. Po flasim për elektoratin më të madh në vend”, deklaroi Lapaj në emisionin “Opinion”.
Lapaj tha se e duhura do të ishte që të dilte një kandidat i pavarur, një person dinjitoz dhe më pas forcat politike ta mbështesnin, atë, por sipas tij, kjo gjë nuk do të ndodhë. Ai e bëri të qartë se nuk do të ketë marrëveshje me subjektet opozitare, pasi sipas tij, nuk mund të bëhet palë e një procesi partiak.
Ndërkohë, Belind Këlliçi tha se ata mirëpresin këdo që është për një front të unifikuar kundër Edi Ramës.
“Si opozitë e bashkuar, kemi pasur takime me të gjitha partitë parlamentare për të gjetur idetë më të mira, për të bashkuar forcat me çdo faktor opozitar, këdo forcë politike opozitare. Qartazi kemi pasur një qëndrim në raport me Lëvizjen Bashkë për shkak të qëndrimeve të kundërta me Partinë Demokratike. Kushdo që do një front të unifikuar përballë Ramës, ne i mirëpresim”, u shpreh Belind Këlliçi i Partisë Demokratike.
Sipas tij, ende nuk janë konkluduar emrat e mundshëm për të qenë pjesë e kësaj gare, megjithatë kjo do vendoset më tej në tryezën e aleatëve.
Sipas Agron Shehajt të Partisë Mundësia, opozita edhe pse nuk është në ditët e saj më të mira, duhet të dalë me një kandidat jashtë partive politike, gjë që sipas tij është absolutisht e mundur.
“Është kjo formulë që të jep mundësinë të shkosh përtej votave të opozitës”, tha Shehaj.
