Sekretari i Përgjithshëm i Partisë Demokratike, Flamur Noka, ka reaguar në Parlament duke e quajtur takimin e qeverisë në Aruba “tronditës”.
Ai akuzoi shumicën e deputetëve të mazhorancës se janë përfaqësues të grupeve kriminale dhe se disa prej tyre kanë lidhje me individë të njohur për aktivitete kriminale. Noka tha se takimi në Aruba është një dëshmi e lidhjeve të qeverisë me kriminelët.
“Njërin deputet e ka sjellë Ben Qimja, një tjetër e kanë sjellë Xhabaftët, tjetrin një klan tjetër kriminal. Takimi në Aruba është tronditës; atje përfaqësues të qeverisë janë takuar me kriminelët. Mazhoranca është e lidhur me Troplinët, Xhabaftët dhe Suel Çelën,” tha Noka.
Ai kritikoi gjithashtu qeverinë për situatën ekonomike në vend, duke iu referuar raportit të Departamentit të Shtetit të SHBA-së, sipas të cilit biznesi shqiptar është deformuar nga kartelet e drogës. Noka tha se kjo ka bërë që shqiptarët të largohen nga vendi për shkak të ndikimit të grupeve narkotike dhe pastrimit të parave.
