Arrestimi i profesorit italian të biologjisë në Universitetin e L’Aquilas, Michele D’Angelo, i cili prej dy muajsh mbahet në paraburgimin e Fierit, ka marrë jehonë të gjerë në mediat italiane dhe është shndërruar në një çështje me ndjeshmëri ndërkombëtare.
Ngjarja lidhet me një aksident rrugor të ndodhur më 8 gusht në aksin Levan–Fier, ku 44-vjeçari u përfshi së bashku me partneren e tij. Të nesërmen ai u ndalua nga policia shqiptare dhe u la në burg me akuzën për shkelje të rregullave të qarkullimit dhe mosdhënie ndihme.
Deputeti italian Luciano D’Alfonso i është drejtuar presidentit Bajram Begaj me një apel për të ndërhyrë në kthimin e profesorit në Itali. Reagime kanë ardhur gjithashtu nga kolegët universitarë të D’Angelos, të cilët kërkojnë lirimin e tij.
Ambasada italiane në Tiranë dhe Konsullata e Përgjithshme në Vlorë po e ndjekin rastin nga afër. Sipas Ministrisë së Jashtme italiane, diplomatët janë në kontakt të vazhdueshëm me autoritetet shqiptare dhe kanë zhvilluar vizita në burg, duke ofruar asistencën e nevojshme.
Universiteti i L’Aquilas ka shprehur mbështetje të plotë për pedagogun. “Po bëjmë gjithçka që mundemi për të kërkuar lirimin e profesorit dhe për të ulur presionin psikologjik mbi të,” deklaroi rektori i zgjedhur Fabio Graziosi.
Ndërkohë, dëshmitarë pranë ngjarjes kanë thënë se profesori po lëvizte me rreth 40 km/h kur një automjet tjetër, që lëvizte me shpejtësi, i doli përpara, duke e bërë të pamundur shmangien e përplasjes.
