Presidenti turk, Rexhep Tajip Erdogan, ndodhet sot (25 shtator) në Uashington, ku pritet të zhvillojë një takim kokë më kokë me presidentin e SHBA-ve, Donald Trump.
Siç raporton BBC Erdogan do të pritet në orët në vijim nga Presidenti Donald Trump në Shtëpinë e Bardhë.
Në takimin dypalësh Erdogan do të kërkojë të arrijë marrëveshje për mbrojtjen dhe energjinë me vlerë dhjetëra miliardë dollarë. Pikë kyçe e diskutimit do të jetë shitja e avionëve luftarakë F-35.
Pritet që të dy udhëheqësit të diskutojnë gjithashtu situatën në Lindjen e Mesme, përfshirë luftën në Gaza.
Disa ditë para vizitës së Erdoganit, Ankaraja njoftoi se hoqi dorë nga tarifat hakmarrëse të vendosura në vitin 2018 ndaj importeve amerikane, në një shenjë të zbutjes së marrëdhënieve dypalëshe.
Takimi i cili do të mbahet në Zyrën Ovale, do të jetë i mbyllur për shtypin.
Në një postim në platformën “X” javën e kaluar, Erdogan tha se dyshja do të diskutojnë lidhur me tregtinë, investimet dhe mbrojtjen, ndër të tjera.
“Unë besoj se takimi ynë me Presidentin Trump do të kontribuojë në ndërprerjen e luftërave dhe konflikteve në rajonin tonë brenda kornizës së vizionit tonë të përbashkët për paqe globale dhe do të forcojë më tej bashkëpunimin midis vendeve tona”, shkroi Erdogan.
Kujtojmë se dy krerët e shteteve u takuan për herë të fundit në Samitin e NATO-s në qershor, pas vizitës së fundit të Erdoganit në Shtëpinë e Bardhë më 13 nëntor 2019.
