Mes tensioneve dhe përplasjeve të forta në Kuvend, shumica socialiste ka miratuar programin e qeverisë “Rama 4” me 82 vota pro, pa asnjë kundërshtim ose abstenim. Programi i qeverisjes përfshin një paketë vendimesh sociale dhe ekonomike, që parashikojnë rritjen e pagës minimale në 500 euro nga 1 janari 2026, përmirësimin e pensioneve dhe shtimin e mbështetjes për fëmijët.
Por ndërsa festohen premtimet, realiteti për qytetarët duket krejt ndryshe. Inflacioni i matur nga Eurostat në gusht 2025 arriti 2,3%, me rritje të ndjeshme çmimesh në grupet “Argëtim dhe kulturë” (9,9%), “Hotele, kafene dhe restorante” (3,6%) dhe “Pije alkoolike dhe duhan” (3,3%). Ushqimet dhe pijet joalkoolike u rritën me 1,7%, ndërsa shërbimet shëndetësore dhe arsimore shënuan rritje prej 1%. Në një situatë ku çmimet rriten më shpejt sesa rriten pagat reale, qytetarët me të ardhura të ulëta nuk ndihen aspak të përmirësuar.
Problemet nuk ndalen vetëm tek inflacioni. Emigrimi i mjekëve shqiptarë po vazhdon të jetë një shqetësim serioz. Të dhënat e OBSH-së tregojnë se mesatarisht rreth 150 mjekë largohen çdo vit nga Shqipëria, pothuaj sa numri i të diplomuarve të rinj në universitetin e vetëm publik të mjekësisë. Diferenca e madhe mes pagave në vend dhe jashtë tij, ku një infermier fiton trefishin e pagës në Gjermani, e bën pothuaj të pamundur mbajtjen e profesionistëve në vend.
Ndërkohë, teksa Rama premton mbrojtjen e pronës, fadromat e IKMT-së në veri të vendit, kanë shembur shtëpi dhe bujtina të banorëve të zonave malore, të ngritura me kursimet e tyre ose me kredi.
Banorët akuzuan kryeministrin për premtime të pambajtura dhe mesazhe kontradiktore: së pari i fton për të investuar në tokat e tyre, pastaj i etiketonte si “kriminelë” dhe “zaptues”.
Pas 12 vitesh pushtet, premtimet për mbrojtjen e pronës, përmirësimin e jetës së përditshme dhe stabilitetin ekonomik duket se përplasen me realitetin e përditshëm: qytetarët përballen me inflacionin në rritje, shërbime shëndetësore të dobësuara për shkak të emigrimit masiv të mjekëve dhe ndërhyrje të dhunshme në pronat private.
