Detaje të reja po dalin në dritë rreth çështjes së vrasjes së aktivistit konservator amerikan, Charlie Kirk, për të cilin akuzohet 22-vjeçari Tyler Robinson. Sipas raportimeve të mediave amerikane, Robinson bashkëjetonte në një apartament me një person transgjinor që ndodhej në proces tranzicioni gjinor nga mashkull në femër.
Burime pranë hetimit kanë bërë të ditur se ky person po bashkëpunon plotësisht me autoritetet, duke dorëzuar edhe mesazhe të dërguara përmes platformës Discord, ku Robinson i tregonte vendndodhjen e armës së përdorur në krim, një zonë pyjore në afërsi.
Sipas burimeve nga FBI, të cituara nga Fox News Digital, Robinson dhe shoku i tij i apartamentit, Lance Twiggs, nuk ishin thjesht bashkëjetues, por kishin një marrëdhënie romantike. Twiggs nuk konsiderohet i përfshirë në vrasje dhe nuk është nën hetim penal, ndërsa vijon të bashkëpunojë me autoritetet.
Megjithatë, identiteti i saktë i Twiggs mbetet i paqartë, pasi emri i tij nuk është përmendur në dëshmitë zyrtare të deritanishme. Familjarët e tij nuk kanë konfirmuar nëse ai është personi transgjinor në fjalë, por një prej të afërmve e ka përshkruar atë si “djalin problematik të familjes”.
Ndërkohë që spekulimet për një motiv të mundshëm politik apo gjinor rreth vrasjes kanë qarkulluar në media, gjyshi i viktimës është shprehur se nuk dëshiron të komentojë mbi natyrën e marrëdhënies midis autorit dhe bashkëjetuesit të tij, duke shtuar: “Nuk jam i sigurt se çfarë ndodh me të në këtë moment.”
Sipas raportimeve të Daily Mail, Robinson dhe Twiggs ishin pjesë e një grupi të madh miqsh që komunikonin rregullisht në Discord, shumica prej të cilëve ishin të diplomuar në gjimnazin Pine View.
Guvernatori i Utahut, Spencer Cox, tha sot se Tyler Robinson, i dyshuari për vrasjen e patriotit amerikan Charlie Kirk, ishte “thellësisht i indoktrinuar me ideologji të krahut të majtë” dhe ishte regjistruar si votues i pavarur, raporton Hill.
“Është shumë e qartë për ne dhe për hetuesit se ky ishte një person thellësisht i indoktrinuar me ideologji të krahut të majtë”, tha Cox për Wall Street Journal.
Cox tha më parë se një anëtar i familjes Robinson u tha hetuesve se i dyshuari, 22 vjeç, ishte “bërë më i prirur politikisht vitet e fundit”.
Një anëtar i familjes, sipas guvernatorit të Utah-ut, tha se Robinson përmendi në një darkë të kohëve të fundit se Kirk ishte planifikuar të fliste në Universitetin e Luginës së Utah-ut, ku ndodhi vrasja.
“Ata folën për arsyet pse nuk e pëlqenin dhe për qëndrimet që kishte. Një anëtar i familjes deklaroi gjithashtu se Kirk ishte plot urrejtje dhe se po përhapte urrejtje”, tha Cox.
Guvernatori i Utah-ut tha se gëzhojat e plumbave që dyshohet se janë përdorur nga Robison kishin të shkruara fjalët e këngës italiane partizane “Bella Ciao”, si dhe “Hej Fashist” dhe “Nëse po e lexon këtë, je gej, LMA”.
