Deputeti dhe nënkryetari i Kuvendit, Agron Gjekmarkaj, ka zbuluar se Partia Demokratike nuk ka marrë ende një vendim nëse do të marrë pjesë në zgjedhjet e pjesshme për Bashkinë e Tiranës.
Demokrati theksoi se vendimi përfundimtar i takon kryetarit të PD-së, Kryesisë dhe Këshillit Kombëtar.
Sa i përket demokratit Ilir Alimehmeti, i cili është komentuar si një nga kandidatët e duhur nga PD përballë socialistes Ogerta Manastirliut në Tiranë, Gjekmarkaj tha se ai është një eksponent i shkëlqyer, por shtoi me tej se e djathta ka shumë potenciale të tjera.
“Nuk e di nëse Alimehmeti dëshiron të bëhet pjesë e kësaj gare nëse PD merr vendimin për t’u përfshirë, por di të them qe PD ka shumë potenciale për t’i dhënë këtij qyteti atë që meriton”, tha ai.
Ndërkohë, duke komentuar kandidaturën e Manastirliut, ai tha se ajo përballet me një sërë akuzash dhe në kushte normale PD do të kishte një garë të lehtë përballë saj.
“PD nuk ka marrë ende asnjë vendim sa i përket zgjedhjeve, është vendim që i përket kryetarit, Kryesisë dhe Këshillit Kombëtar të PD. Them me bindje që do kishte kuptim nëse që zgjedhjet do ishin të lira dhe do ishte mundësi për çdo opozitë të shtetëzonte mundësitë dhe të bënte rrotacion, qoftë dhe në Tiranë.
PD i ka të gjitha potencialet për të qenë fituese. Ju përmendët Alimehmetin që është një eksponent i shkëlqyer, por bashkë me të, mendoj se e djathta ka shumë potenciale, shumë potenciale të tjera. Nuk e di nëse Alimehmeti dëshiron të bëhet pjesë e kësaj gare nëse PD merr vendimin për t’u përfshirë, por di të them qe PD ka shumë potenciale për t’i dhënë këtij qyteti atë që meriton.
Manastirliu ka një listë të gjatë akuzash, në kushte normale do ishte një kandidaturë ku PD nuk do kishte të vështirë ta mundte. Nuk kemi në kushte normale, pushteti dhe shteti bëhet një, drejtësia ndjek linjën partiake,… jemi në kushtet e një farse.“- tha Gjekmarkaj për News24.
