Një tërmet i fortë me magnitudë 7.4 goditi këtë të shtunë pranë brigjeve lindore të rajonit Kamchatka në Rusi, njoftoi Shërbimi Kombëtar i Motit i SHBA-ve përmes Qendrës së Paralajmërimit për Cunami në Paqësor. Autoritetet shtuan se nuk ka rrezik për cunami.
Shërbimi Gjeologjik i Shteteve të Bashkuara (USGS) raportoi se tërmeti kishte një thellësi prej 39.5 kilometrash, ndërsa Qendra Gjermane për Kërkime Gjeoshkencore vlerësoi magnitudën në 7.1 ballë, me një thellësi prej 10 kilometrash. Fillimisht, Qendra e Paralajmërimit për Cunami kishte lëshuar një njoftim për rrezik të mundshëm.
Në Japoni, që ndodhet në jugperëndim të gadishullit Kamchatka, nuk është lëshuar asnjë paralajmërim për cunami, raportoi televizioni publik NHK, duke cituar Agjencinë Meteorologjike Japoneze.
Ky rajon i Rusisë u godit edhe në korrik të këtij viti nga një tërmet më i fuqishëm, i cili krijoi një cunami që përfshiu pjesë të Paqësorit dhe arriti deri në SHBA.
