Byroja Federale e Hetimit (FBI) ka publikuar dy fotografi të një “personi me interes” në vrasjen me armë zjarri të influencuesit konservator Charlie Kirk.
“Po kërkojmë ndihmën e publikut për të identifikuar këtë person me interes në lidhje me vrasjen fatale të Charlie Kirk në Universitetin e Luginës së Utah”, shkroi zyra e FBI në rrjetin social “X” së bashku me fotot, të cilat tregojnë një mashkull të dobët të veshur nga koka te këmbët me rroba të errëta.
Personi mban syze dielli, një kapele me ngjyrë të errët dhe një këmishë me mëngë të gjata që duket se ka një flamur amerikan mbi të.
Komisioneri i Departamentit të Sigurisë Publike të Utah, Beau Mason, tha se autori i dyshuar është në moshë studentore. Por deri më tani, autoritetet nuk e kanë identifikuar dhe kanë kërkuar ndihmën e publikut dhe të medias.
Vrasja, e filmuar me hollësi, u përhap me shpejtësi në internet. Sulmi ndodhi ndërsa i ndjeri Kirk fliste në skenë përpara rreth 3 mijë pjesëmarrësve.
Vrasësi mbërriti në kampus disa minuta para se të fillonte veprimtaria dhe mund të shihet në pamjet e kamerave të sigurisë duke ngjitur shkallët e një çatie aty pranë.
Pas krimit, ai besohet se u hodh nga çatia dhe iku në një lagje ngjitur, u tha gazetarëve agjenti special i FBI-së Robert Bohls.
Presidenti Donald Trump tha se do t’i japë Charlie Kirk pas vdekjes Medaljen e Lirisë. Ai foli gjatë ceremonisë për 11 Shtatorin në Pentagon.
