Raiffeisen Bank, një nga bankat më të mëdha në Shqipëri, dyshohet se ka abuzuar me kredimarrësit hipotekorë duke shkelur ligjin, pasi ka zgjedhur vetëm një kompani për sigurimin e jetës, duke dëmtuar interesat e klientëve.
Kjo është konstatuar nga një hetim i Autoritetit të Konkurrencës mbi mënyrën se si bankat e nivelit të dytë përzgjedhin shoqëritë e sigurimit të jetës për klientët që marrin kredi hipotekore. Sipas rregullave, në këto raste sigurimi i jetës është i detyrueshëm.
Nga shqyrtimi i dokumentacionit rezulton se sjellja e Raiffeisen Bank SHA mund të përbëjë shkelje të neneve 4 dhe 9 të Ligjit nr. 9121, datë 28.07.2003 “Për mbrojtjen e konkurrencës”.
Për kreditë konsumatore, banka ka lidhur kontratë me Sigal Life, duke e bërë atë të vetmen shoqëri sigurimi ku klientët mund të merrnin policën e detyrueshme.
Gjatë periudhës së hetimit janë prerë rreth 39,000 polica sigurimi vetëm pranë Sigal Life, e cila ka përfituar mbi 90% të tregut të sigurimit të jetës për kreditë pranë Raiffeisen Bank. Për rrjedhojë, banka ka arkëtuar të ardhura të konsiderueshme nga komisionet e marra prej kësaj shoqërie.
Në përfundim, Autoriteti i Konkurrencës vlerëson se sjellja e Raiffeisen Bank SHA ka kufizuar zgjedhjet e klientëve dhe ka ndikuar në konkurrencën e tregut.
Autoriteti u bën thirrje të gjithë kredimarrësve që kanë paguar sigurimin e jetës pranë bankës të japin dëshmi dhe informacion mbi eksperiencën e tyre, veçanërisht nëse:
• nuk u është dhënë mundësia të zgjedhin lirisht shoqërinë e sigurimit të jetës, ose
• kanë pasur pengesa apo detyrime të imponuara nga banka lidhur me këtë zgjedhje.
LEXO EDHE:
Tentuan ti marrin shtëpinë, qytetarja zbulon kredinë false tek “Raiffeisen Bank”
Dosja/ Raiffeisen Bank pranon skandalin: Kemi dhënë kredi me dokumenta të rreme, por jemi viktimë
Kreditë me letra false të “Raiffeisen”, banka i kërkon qytetarit mbi 8 mln lekë të marra nga ortaku
Pse hakerat po përdorin emrin e “Raiffeisen Bank” për të vjedhur qytetarët?
