Të martën në mbrëmje, një sulm vetëvrasës me bombë pranë një tubimi politik në Quetta, kryeqytetin e provincës Balochistan, la të vrarë 15 persona dhe më shumë se 30 të plagosur. Qindra anëtarë të Partisë Kombëtare të Balochistanit (BNP) ishin mbledhur për të nderuar ish-kryeministrin Ataullah Mengal, i cili vdiq në vitin 2021, raporton BBC.
Grupi militant i Shtetit Islamik ka marrë përgjegjësinë për sulmin. Ministri i shëndetësisë i Balochistanit, Bakht Muhammad Kakar, tha se kamikazi nuk arriti të depërtonte brenda stadiumit falë masave të rrepta të sigurisë. Zyrtari qeveritar Hamza Shafqaat theksoi se dëmi mund të kishte qenë shumë më i madh po të kishte shpërthyer brenda vendit të tubimit, ku ishin vendosur 120 policë për siguri.
Kryeministri i Pakistanit, Shehbaz Sharif, dënoi sulmin dhe e quajti atë një përpjekje të terroristëve për të përhapur kaos në rajon. Banorët e Balochistanit jetojnë prej vitesh nën kërcënimin e sulmeve të vazhdueshme nga Shteti Islamik dhe grupet separatiste.
Sulmi i fundit vjen pas një serie ngjarjesh të dhunshme në provincë, përfshirë shpërthime në zyrat zgjedhore në shkurt 2024, ku humbën jetën mbi 20 persona, dhe një sulm në një stacion hekurudhor në nëntor, ku u vranë po ashtu më shumë se 20 persona. Në mars të këtij viti, militantë të Ushtrisë Çlirimtare të Balochistanit rrëmbyen një tren me më shumë se 400 pasagjerë, duke kërcënuar jetën e tyre për lirimin e të burgosurve politikë.
