Policia e Shkodrës ka arrestuar një person, i cili akuzohet se ka shkaktuar ndotje të mjedisit me zjarrin që kishte ndezur për djegien e mbetjeve në subjektin që ai menaxhon.
Në pranga është vënë shtetasi Gentian Gjuhca, 44 vjeç, banues në Shkodër, mbi të cilin rëndojnë akuzat për veprat penale “Menaxhimi i mbetjeve”, “Ndotja e ajrit”, “Ndotja e ujërave” dhe “Fshehja e të ardhurave”.
“Ky shtetas dyshohet se ka ndezur zjarr mbrëmjen e djeshme, rreth orës 20:30, për djegien e mbetjeve në subjektin që menaxhon, në lagjen “Bahçallëk”, dhe si pasojë është shkaktuar ndotje e mjedisit në zonën përreth.” – thuhet në njoftimin e Policisë.
Burime bëjnë me dije se Gentian Gjuhca është pronari i landfillit privat në Shkodër, “Buna Recycling”, me fushën e veprimtarisë “Grumbullim, transportim dhe diferencim i mbetjeve urbane jo te rrezikshme”.
Materialet procedurale i kanë kaluar Prokurorisë së Shkodrës për veprime të mëtejshme.
