Teksa na ndajnë vetëm pak ditë nga shpallja e Qeverisë së re nga Edi Rama, Sali Berisha ka deklaruar se kartelet e drogës po përleshen se kush do ta marrë ministrin e Brendshëm.
Gjatë një konference me gazetarët, Berisha tha se grupi i Troplinëve dhe Ergys Agasin kërkojnë që në postin e ministrit të Brendshëm të emërohet drejtuesja aktuale e SHISH, Vlora Hyseni, duke hequr dorë nga Arkend Balla, ndërsa grupi tjetër është për Ani Dyrmishin.
“Komenti im është ky. Edi Rama i tmerruar nga krimet që ka kryer, nga farsa elektorale, nga damoskja tani me vetëkuptim, si anëtar i organizatës kriminale Sorosiane, është i aftë të marrë çdo vendim në verbëri. Por ju garantoj ju, se opozita do të qëndrojë fuqishëm me dritën e transparencës. Pavarësisht nga përpjekjet e tij të dështuara, opozita do ti japë transparencën shqiptarëve. Tani unë thashë se do më pyesje ti mua, se çfarë po zien në kartelet e drogës për emërimin e ministrave të Edi Ramës. Por kjo është kryesorja. Priten përleshje të mëdha midis tyre, kush të marrë Ministrin e Brendshëm. Troplinët me Agasin janë për Vlora Hysenin. E keni marrë vesh besoj. Të tjerë janë për atë Dyrmishin. Ata e lanë Arkend Ballën dhe duan Vlorën tani. Këta të Elbasanit nuk heqin dorë nga Taulanti. Tani, betejat po zhvillohen midis klaneve, karteleve të drogës. Mendoj se këto i interesojnë popullit më shumë. Prandaj dhe është detyrë që të ua themi.” – tha Berisha.
