Ministri i Jashtëm turk, Hakan Fidan, paralajmëroi sot Izraelin se çdo kërcënim ndaj Turqisë do të marrë një përgjigje të menjëhershme. Deklarata u bë gjatë një seance të jashtëzakonshme të parlamentit turk mbi situatën në Gaza.
“Nuk kemi ndërmend të sulmojmë askënd, përveç nëse kërcënohemi. Në atë rast nuk do të tërhiqemi dhe përgjigja jonë nuk do të vonojë”, tha Fidan. Ai shtoi se mesazhi i Ankarasë është i qartë: “Mos u tregoni armiqësorë ndaj nesh dhe ne nuk do të jemi armiqësorë ndaj jush. Por nëse dikush guxon të na kërcënojë, do të përballet me pasojat.”
Ky paralajmërim vjen një ditë pas vendimit të Turqisë për të ndërprerë të gjitha lidhjet tregtare me Izraelin, për të ndaluar ankorimin e anijeve izraelite në portet turke dhe për të mbyllur hapësirën ajrore për avionët izraelitë.
Vendimi i qeverisë turke vjen si reagim ndaj ofensivës së Izraelit në Rripin e Gazës dhe pas vendimeve të mëparshme për kufizimin e lidhjeve diplomatike dhe ekonomike me Tel Avivin. Në maj 2024, Turqia kishte ndërprerë eksportet dhe importet me Izraelin, përfshirë produkte kyçe si çelik, çimento dhe aviacion, pas refuzimit të Izraelit për të lejuar dërgimin e ndihmave humanitare turke në Gaza.
Turqia, ndërkohë, po përballet edhe me sfida të tjera rajonale, përfshirë tensionet me Iranin dhe përpjekjet për ndërmjetësim në konflikte të tjera në Lindjen e Mesme.
