Ushtria izraelite ka nisur një ofensivë të re në qytetin e Gazës, e cila është dënuar gjerësisht nga komuniteti ndërkombëtar. Qyteti më i madh i Rripit është shpallur zonë lufte, ndërsa civilët e mbetur aty po përballen me urinë dhe mjerim ekstrem.
Zyrtarët e shëndetësisë njoftuan se numri i viktimave palestineze ka arritur në 63,025, me 59 të vrarë vetëm gjatë 24 orëve të fundit. Pavarësisht paralajmërimeve për evakuim, grupe ndihme dhe një kishë që strehojnë të zhvendosurit kanë deklaruar se do të qëndrojnë në qytet për të ndihmuar të uriturit.
Banorët përshkruajnë situatën si të padurueshme.
“Masakrat nuk u ndalën kurrë, madje as gjatë pauzave humanitare”, tha Mohamed Aboul Hadi.
“Na hedhin në rrugë, si qen? Ne nuk jemi qen”, u shpreh një tjetër banor, Mohammed Maarouf.
Izraeli pretendon se qyteti i Gazës mbetet një fortesë e Hamasit me një rrjet tunelesh aktiv, duke theksuar se shkatërrimi i tyre është i domosdoshëm për të parandaluar një përsëritje të sulmit të 7 tetorit 2023.
Ndërkohë, organizatat e ndihmës dhe agjencitë e OKB-së paralajmërojnë për katastrofë humanitare, duke akuzuar Izraelin se nuk ka marrë parasysh dënimin ndërkombëtar dhe thirrjet për ndaljen e luftimeve.
