Këshilli i Lartë Gjyqësor (KLGJ) reagoi ndaj deklaratave të fundit publike, duke ritheksuar se sulmet ndaj gjyqtarëve cenojnë figurën dhe dinjitetin e tyre dhe minojnë pavarësinë e pushtetit gjyqësor. KLGJ nënvizon se ushtrimi i funksionit gjyqësor duhet të jetë i pavarur dhe i çliruar nga çdo ndikim, duke iu nënshtruar vetëm Kushtetutës dhe ligjeve.
Reagimi vjen pas deklaratave të Kryeministrit Edi Rama, i cili ka kritikuar publikisht disa gjyqtarë, përfshirë “gjykatësi Ligoraq”(siç e quajti Rama me ironi), prokuroren Gjeli dhe gjyqtarët Balliu e Demiri, lidhur me vendime për ndërtime pa leje në Tiranë. Rama publikoi edhe foto të objekteve dhe paralajmëroi se disa vendime do të ankimohen nga Ministria e Drejtësisë.
KLGJ thekson se çdo ankesë ndaj gjyqtarëve duhet të drejtohet përmes institucioneve përkatëse dhe sipas procedurave ligjore, duke shmangur sulmet publike që dobësojnë besimin e qytetarëve në sistemin gjyqësor. Këshilli shpreh mbështetje për të gjithë gjyqtarët dhe i inkurajon ata të ushtrojnë funksionin e tyre në mënyrë të përgjegjshme dhe të pavarur.
Në reagimin e tij, Rama mohoi që deklaratat e tij të përbënin presion ndaj gjyqtarëve, duke i konsideruar si pjesë të qëndrimit të tij në mbështetje të drejtësisë dhe luftës kundër korrupsionit dhe ndërtimeve pa leje. Ai paralajmëroi gjithashtu se emrat e gjyqtarëve të përfshirë në vendime për ndërtimet pa leje do të regjistrohen në një dosje që Ministria e Drejtësisë do t’i dërgojë organeve të kontrollit të gjyqësorit.
Reagimi:
Këshilli i Lartë Gjyqësor, duke marrë shkas nga deklaratat e fundit të subjekteve publike apo private, rithekson edhe njëherë se deklarata të tilla cënojnë figurën dhe dinjitetin e gjyqtarëve si dhe minojnë pavarësinë e pushtetit gjyqësor.
Në çdo shoqëri demokratike, gjyqtarët janë garantues të barazisë së palëve përpara ligjit. Për rrjedhojë, ushtrimi i funksionit të tyre duhet të jetë i pavarur dhe i çliruar nga çdo formë ndikimi, duke ju nënshtruar vetëm Kushtetutës dhe ligjeve. Në një shtet të së drejtës, ndarja dhe balancimi i pushteteve përbën parim themelor dhe gjyqtari ushtron funksionet në mënyrë të pavarur, duke vlerësuar faktet dhe interpretuar ligjin, i lirë nga çdo ndikim i jashtëm.
Këshilli ju bën thirrje gjithë subjekteve publike dhe private të respektojnë pavarësinë e gjyqësorit si një nga themelet e shtetit të së drejtës. E vetmja rrugë për të kundërshtuar një vendim gjyqësor është përmes mjeteve procedurale të parashikuara nga ligji, duke u ankuar në një gjykatë më të lartë. Po ashtu, çdo ankesë apo pretendim në lidhje me sjelljen apo integritetin e një gjyqtari duhet të drejtohet pranë institucioneve përkatëse.
KLGJ në përputhje me kompetencat kushtetuese, shpreh mbështetjen e plotë ndaj të gjithë gjyqtarëve dhe përpjekjeve të tyre të përditshme në mbrojtje të të drejtave të qytetarëve dhe në shërbim të interesit publik. Po ashtu i inkurajon ata të ushtrojnë funksionin e tyre, në mënyrë të përgjegjshme dhe të pavarur nga çdo ndikim i jashtëm.
Në një shtet të së drejtës – i cili sot është më pranë se kurrë aspiratës për t’u bërë pjesë e Bashkimit Evropian – vetëm përmes një sistemi gjyqësor të pavarur mund të sigurohet barazia para ligjit dhe një drejtësi efektive, e cila meriton besimin e publikut.
