Presidenti ukrainas Volodymyr Zelensky mbërriti në Shtëpinë e Bardhë për takime me presidentin amerikan Donald Trump. Gjatë një konference për gazetarët, Trump tha se ekziston një “shans i arsyeshëm” që lufta Rusi-Ukrainë të përfundojë nëse zhvillohet një takim trepalësh me Presidentin ukrainas dhe Presidentin rus, Vladimir Putin.
“Mendoj se nëse gjithçka shkon mirë sot, do të kemi një takim trepalësh dhe mendoj se do të ketë një shans të arsyeshëm për t’i dhënë fund luftës kur ta bëjmë këtë,” u shpreh Trump.
Ai shtoi më vonë se, ndërsa nuk mund të japë detaje të sakta, të dy liderët, si ai ashtu edhe Putin, dëshirojnë që konflikti të përfundojë. “E gjithë bota është e lodhur prej saj dhe ne do ta përfundojmë,” tha Trump.
Zelensky theksoi se një paqe e drejtë dhe e qëndrueshme është e domosdoshme për Ukrainën pas më shumë se tre vjet pushtimi rus. Trump u shpreh se synimi është të arrihet një paqe e qëndrueshme për vendin.
