Presidenti i SHBA-së, Donald Trump, priti Presidentin rus Vladimir Putin në bazën e Elmendorf-Richardson në Anchorage të Alaskës.
Të dy udhëheqësit shtrënguan duart. Ata gjithashtu shkëmbyen fjalë të mira dhe buzëqeshje ndërsa pozuan për foto për shtypin botëror.
Më tej, të dy presidentët kanë hipur në një makinë për t’u nisur drejt takimit.
Sytë e botës janë të kthyer nga ky takim që mund të shënojë një kthesë në konfliktin ruso-ukrainas. Shtëpia e Bardhë ka publikuar axhendën e takimit të dy udhëheqësve.
Trump ka thënë para takimit se do ta kuptonte që në minutat e para nëse ai dhe Putini do të kishin një takim të mirë, duke thënë se përndryshe do të përfundonte shumë shpejt. Qëllimi i tij për bisedimet është të përgatisë tryezën për një takim tjetër me udhëheqësin rus dhe Presidentin e Ukrainës Zelenskyy.
Ndërkohë Ministri i Jashtëm rus Sergej Lavrov tha se Moska do t’i paraqesë një pozicion të qartë dhe të kuptueshëm Presidentit të SHBA-së Donald Trump gjatë samitit me Presidentin rus Vladimir Putin.
Lavrov foli shkurt me gazetarët ndërsa mbërriti në një hotel në Anchorage të enjten, i veshur me një pulovër me mbishkrimin “CCCP”, Bashkimi i Republikave Socialiste Sovjetike.
