Situata në njësinë Skënderbegas të Gramshit vijon të jetë e rënduar, teksa flakët kanë kaluar nga një fshat në tjetrin duke shkaktuar dëme të mëdha materiale.
Deri më tani janë shkrumbuar 39 banesa, sipërfaqe të mëdha me pyje e shkurre, si dhe dhjetëra bagëti që mbetën të rrethuara nga zjarri. Në mesditë, flakët kanë hyrë edhe në fshatin e tetë të kësaj njësie.
Për zjarrfikësit, beteja me flakët është po aq e vështirë sa ajo për bindjen e banorëve të largohen nga zonat e rrezikuara. Shumë prej tyre kanë refuzuar të ikin, duke qëndruar për të mbrojtur shtëpitë e tyre.
Një rrezik shtesë vjen nga kafshët e ngordhura, të cilat mund të bëhen burim përhapjeje sëmundjesh nëse nuk largohen dhe asgjësohen menjëherë. Ekspertët paralajmërojnë se ndërhyrja duhet të jetë e shpejtë për të shmangur probleme të tjera shëndetësore në zonë.
