Delvina është një nga zonat më të prekura nga zjarret në 24 orët e fundit në vendin tonë, ku qytetarët dhe zjarrfikësit po përballen me zjarre të mëdha që kanë përfshirë zonën.
Sipas banorëve, terreni i vështirë po e bën ndërhyrjen pothuajse të pamundur, duke e përkeqësuar situatën nga momenti në moment.
Banorët raportojnë se disa zona janë evakuuar dhe vatrat e zjarrit po aktivizohen në mënyrë të vazhdueshme, duke e bërë situatën të pakontrollueshme. Flakët janë përhapur në çdo cep të qytetit, ndërsa zjarri ka shkaktuar dëme të mëdha materiale dhenë mjedis.
Një qytetare e prekur nga situata shprehet: “Janë djegur shumë shtëpi, me njerëz brenda. Kërkojmë ndihmën e shtetit që, të paktën, t’u sigurojë banesa të reja familjeve të mbetura pa strehë.”
Të tjerë banorë denoncojnë se ndërhyrja ajrore ka qenë e vonuar, çka ka lejuar përhapjen e mëtejshme të flakëve. Ata po nxitojnë të largojnë familjet dhe fëmijët nga zonat e rrezikuara, ndërsa një pjesë e madhe e qytetit raportohet se është përfshirë nga zjarri.
Autoritetet ende nuk kanë dhënë një deklaratë zyrtare për numrin e saktë të dëmeve apo nëse ka viktima, por situata mbetet kritike dhe në zhvillim.
