Një pushues ka denoncuar publikisht në JOQ një incident shqetësues që ka ndodhur në resortin Green Coast, ku ai pretendon se i është grabitur vila e marrë me qira, ndërkohë që asnjë institucion apo shërbim sigurie nuk ka mbajtur përgjegjësi.
Sipas tij, ngjarja ndodhi mbrëmjen e djeshme, rreth orës 23:00, kur ai doli nga vila ku ishte akomoduar me familjen, e cila po flinte, për të vizituar një mik në një tjetër vilë brenda resortit. Kur u kthye pas orës 1:15 të mëngjesit, konstatoi se dera me shinë ishte e hapur, perdet ishin shkulur dhe ambienti ishte i çrregulluar.
Fillimisht mendoi se mund ta kishin bërë fëmijët rrëmujën, por mëngjesin tjetër, kushërira e tij konstatoi humbjen e një byzylyku tennis me vlerë 5 mijë euro si dhe 8 mijë euro cash. Menjëherë ai thirri shërbimin e sigurisë së resortit Global Security të deputetit të PS Agron Malaj, njoftoi edhe policinë.
“Erdhi policia, bëri procedurat normale, por sigurimi më tha: ‘Ne nuk mbajmë përgjegjësi për vilat, vetëm për hapësirat e përbashkëta të resortit’,” thotë pushuesi.
Ndërkohë, kur ai kërkoi pamjet e kamerave të sigurisë nga hapësirat publike të resortit, mori përgjigjen se nuk ekzistojnë kamera, pasi “banorët nuk i duan për shkak të privatësisë.”
“Pra, në Green Coast, në resortin e bossave të mëdhenj, nuk ka kamera sigurie dhe nuk mban njeri përgjegjësi,” shprehet pushuesi i revoltuar.
Sipas tij, edhe pas kontaktit me kompaninë e sigurimit “Global Security”, përgjigjja ishte zhgënjyese: “Nuk mbajmë përgjegjësi. As nuk na intereson. Kamera në rrugët e resortit nuk ka.”
DENONCIMI
“Dje rreth orës 5-6 kam mbërritur në Green Coast, ku kam marrë një vilë me qira 1 mijë euro nata. Në orën 10 të darkës është shtrirë gjithë familja me fëmijë për të fjetur dhe unë kam dalë nga vila në orën 11 dhe shkova të rrija te vila e një miku tim deri në orën 1:15. Kur kthehem në vilë, gjej derën me shinë të hapur dhe perdet e shkulura me forcë, dhe vendin komplet pis me patatina. Mendova se mos i kishin çuar fëmijët poshtë dhe kishin bërë rrëmujë, ndaj nuk i kushtova shumë rëndësi.
Në mëngjes zgjohemi të gjithë dhe kushërira nuk gjen tenisin me vlerë 5 mijë euro dhe 8 mijë euro cash. Thirrëm sigurimin, ata erdhën dhe njoftuan policinë. Erdhi policia, bëri procedurat normale dhe ata thonë: “Ne nuk mbajmë përgjegjësi.”
Kërkova përgjegjësi nga sigurimi i resortit dhe ata thonë: “NE NUK MBAJMË GARANCI PËR ÇFARË VJEDHIN NË VILË, POR NE MBAJMË GARANCI VETËM PËR HAPËSIRAT E PËRBASHKËTA TË RESORTIT.”
I thashë: “Kjo s’është normale,” por okej meqë mbani përgjegjësi vetëm për hapësirat publike, i kërkova kamerat e hapësirave të përbashkëta të resortit dhe ata thonë që NUK KA KAMERA ASNJËKUND NË RESORT, SEPSE BANORËT NUK I DUAN PËR SHKAK TË PRIVACISË.
Pra, në Green Coast, në resortet e bossave të mëdhenj, nuk ka kamera sigurie dhe nuk mban njeri përgjegjësi.
Kemi folur me kompaninë e sigurimit Global Security dhe ata thonë që: “Ne s’mbajmë përgjegjësi.” As që u intereson. Madje thonë që nuk ka kamera fare nëpër rrugët e resortit.”
