Autoritetet lokale të qytetit Jumilla në Spanjë kanë ndaluar përdorimin e hapësirave publike për festimet fetare të komunitetit mysliman, si Fitër Bajrami dhe Kurban Bajrami.
Vendimi ndalon shfrytëzimin e qendrave kulturore dhe sallave sportive për aktivitete fetare që, sipas dokumentit zyrtar, “janë të huaja për identitetin tonë”, përveçse kur organizohen nga autoritetet vendore.
Ky është rasti i parë i tillë në Spanjë dhe ka ngjallur reagime të forta. Mounir Benjelloun Andaloussi Azhar, kryetar i Federatës Spanjolle Islamike, e ka cilësuar vendimin si islamofobik dhe diskriminues.
“Ata nuk po dalin kundër asnjë feje tjetër, po vetëm kundër tonës. Për herë të parë në 30 vjet kam frikë çfarë po ndodh në Spanjë”, deklaroi ai për mediat.
Jumilla është një qytet me rreth 27 mijë banorë, ku rreth 7.5% e popullsisë janë myslimanë. Vendimi pritet të kundërshtohet përmes rrugëve ligjore, pasi liria fetare mbrohet nga Kushtetuta e Spanjës.
