Gjykata e Vlorës ka vendosur masën e sigurisë “arrest me burg” për tre persona të dyshuar se ndihmuan Flodian Plakun, ndërsa ky i fundit ishte në kërkim për vrasjen e Gentjan Bejtjas, ngjarje e ndodhur më 15 mars 2024 në fshatin Larushkë të Krujës.
Në burg janë lënë:
Albano Lapshi, i cili dyshohet se furnizonte me ushqime të kërkuarin Plaku,
Ligor Doko, pronari i hotelit ku u arrestua i shumëkërkuari,
Julian Aliaj, i kapur me armë zjarri gjatë operacionit.
Ndërkohë, gjykata ka caktuar masën “detyrim paraqitje” për Armando Danon, berber me origjinë nga Shkodra.
Kush është Flodian Plaku?
Flodian Plaku, 42 vjeç nga Vlora, dyshohet si një nga tre atentatorët e përfshirë në vrasjen e Gentjan Bejtjas. Ai mban edhe dy mbiemra të tjerë, Flodian Mamo dhe Flodian Serjani, ndërsa njihet me pseudonimin “Pole Qorri”. Plaku dyshohet të jetë pjesë e grupeve kriminale të Vlorës dhe të ketë vepruar si vrasës me pagesë.
Sipas hetimeve, autorët e atentatit janë afruar në banesën e Bejtjas me një automjet tip “Land Rover Discover” ngjyrë të zezë dhe pas ekzekutimit janë larguar drejt aksit Larushkë–Thumanë. Më pas, në fshatin Hasan, mjeti u dogj. Nga aty, autorët kanë përdorur një tjetër automjet tip “Volkswagen Golf”, pa targë në pjesën e pasme, duke ndjekur një itinerar të detajuar për t’u larguar nga zona.
Vrasja e Gentjan Bejtjas
Gentjan Bejtja u ekzekutua në banesën e tij më 15 mars 2024. Ai ishte një emër i njohur për drejtësinë, i dyshuar për përfshirje në disa ngjarje kriminale. Më 9 janar 2022, ai i shpëtoi një atentati me kallashnikov në afërsi të Niklës, por u plagos miku i tij, Klodian Stafuka, që ndodhej në makinë me të. Për vrasjen e Bejtjas, dy të dyshuar të tjerë janë Edison Haxhia dhe Ilir Beqiraj.
LEXO EDHE:
Vlorë/ Ndihmuan Flodian Plakun, gjykata jep sot masat për 4 të arrestuarit
