Trajneri i Dinamos Ilir Daja, ka dalë sot në një konferencë për shtyp në prag të ndeshjes së rëndësishme që ekipi i tij do të zhvillojë nesër kundër Hajduk Split në Kroaci, në kuadër të turit të tretë të UEFA Conference League.
Tekniku shqiptar ka pranuar se përballja do të jetë tepër e vështirë, por është shprehur optimist për një paraqitje dinjitoze.
“Na pret një ndeshje me koeficient të lartë vështirësie, jo vetëm për traditën që Hajduku ka në futbollin vendas, por edhe për eksperiencën në kompeticionet ndërkombëtare dhe mbështetjen e madhe të tifozëve që do të kenë,” tha Daja.
Megjithatë, trajneri nuk ngurroi të theksojë se skuadra e tij është e përgatitur dhe e motivuar për të dhënë maksimumin në fushë: “Do të mundohemi të jemi sa më të përqendruar dhe do të bëjmë maksimumin për të marrë një rezultat pozitiv. Hajduku është favorit, por ndonjëherë vështirësitë të bëjnë më të fortë, të motivojnë më shumë.”
I pyetur për përballjet e mëparshme me skuadra kroate, Daja kujtoi sfidat ndaj Dinamos së Zagrebit: “Kam një fitore, një humbje dhe dy barazime ndaj Dinamos. Ndeshjet me ekipet kroate kanë qenë gjithmonë të bukura, sepse luhet futboll i bukur. Sigurisht, kohët ndryshojnë dhe skuadrat ndryshojnë, sidomos në verë.”
Trajneri shqiptar theksoi gjithashtu rëndësinë e respektit ndaj kundërshtarit pa pasur frikë: “Të respektosh kundërshtarin nuk do të thotë ta kesh frikë. Do të japim gjithçka në këtë ndeshje.”
Në lidhje me deklaratën e fundit të Ervin Bulkut, Daja preferoi të mos i japë shumë rëndësi: “Kam folur personalisht me të, e kam pasur lojtar. E kuptoj që lojtarët flasin me kënaqësi për ekipet ku kanë luajtur. Rëndësi ka çfarë do të bëjmë nesër në fushë, jo çfarë është thënë.”
Në fund, ai theksoi filozofinë e klubit që drejton për zhvillimin e talenteve: “Si klub kemi politikë që të rrisim lojtarët dhe t’i ndihmojmë të kalojnë në kampionate më të forta, siç ka ndodhur edhe me Itodon.”
