Kristjan Asllani e ka kuptuar që e ardhmja e tij është larg Interit, pasi edhe klubi e ka bërë publike dëshirën për transferimin e futbollisti shqiptar. Megjithatë, mesfushori kërkon të largohet drejt një destinacioni që të kënaqë ambiciet e tij, duke mos pranuar ofertën e parë që u vjen zikaltërve.
Kësisoj, ai ka refuzuar fillimisht mundësinë për t’u transferuar jashtë Italisë, ku e priste krahëhapur Betisi në La Liga. Ndërsa tani bëhet e ditur se ka refuzuar një skuadër të Serisë A, duke mos nisur bisedimet me të, pavarësisht interesit të kësaj të fundit.
Bëhet fjalë për Sasuolon e sapongjitur në Serinë A, i cili nën drejtimin e trajnerit Fabio Groso, kërkon të afirmohet përsëri në elitë si në të kaluarën ku ishte kthyer në një ekip mesi tabele.
Klubi ka kërkuar informacion për Asllanin por mediat italiane bëjnë të ditur se mesfushorin shqiptar nuk e tërheq si destinacion për të vazhduar karrierën, ndaj nuk ka nisur asnjë bisedim konkret për një transferim të tillë në këtë moment.
