Kryeministri izraelit Benjamin Netanyahu ka deklaruar se vetëm mposhtja e plotë e Hamasit do të sigurojë lirimin e pengjeve izraelite dhe do t’i japë fund kërcënimit nga Rripi i Gazës.
Në një deklaratë nga zyra e tij, Netanyahu tha se “Izraeli nuk do të braktisë asnjë nga misionet e tij: mposhtjen e armikut, lirimin e pengjeve dhe eliminimin e kërcënimit nga Gaza.”
Kjo deklaratë vjen vetëm një ditë pasi kryeministri vendosi qëllimin për të marrë nën kontroll të gjithë territorin e enklavës palestineze. Aktualisht, ushtria izraelite (IDF) kontrollon rreth 75% të Gazës, ndërsa plani i ri synon pushtimin e 25% të mbetur.
Megjithatë, plani ka shkaktuar reagime të forta edhe brenda vetë Izraelit. Netanyahu i ka bërë thirrje shefit të ushtrisë të japë dorëheqjen nëse nuk mbështet strategjinë e tij, duke thelluar kështu ndarjet në hierarkinë ushtarake. IDF ka shprehur rezerva ndaj një pushtimi të plotë, duke paralajmëruar se operacioni mund të zgjasë me vite dhe se rrezikon jetën e pengjeve në zonat ku dyshohet se mbahen ata.
Nga ana tjetër, familjarët e pengjeve dhe organizata ndërkombëtare po ushtrojnë presion për një marrëveshje që do të sillte lirimin e tyre. Për muaj me radhë janë zhvilluar bisedime në Doha mes Izraelit, Hamasit dhe ndërmjetësve, por deri më tani pa një marrëveshje përfundimtare.
Hamasi ka vendosur kushte për t’u rikthyer në negociata, duke kërkuar që qindra kamionë me ndihma humanitare të lejohen të hyjnë në Gaza. Fundjavën e kaluar, grupi publikoi video ku tregoheshin pengje të dobësuara, duke pretenduar se po vdisnin nga uria.
Ndërsa Kryqi i Kuq ka rënë dakord të shtojë përpjekjet për të ndihmuar pengjet, Hamasi ka vendosur si kusht që Izraeli të hapë korridore humanitare të përhershme dhe të ndalojë fluturimet gjatë shpërndarjes së ndihmave.
Fati i qindra civilëve në zonën e luftës dhe i miliona palestinezëve që jetojnë në Gaza mbetet i paqartë, ndërkohë që vendimet e reja të Netanyahu-t priten brenda javës.
