Zjarret në të gjithë Europën janë rritur në nivele rekord këtë verë, me flakë intensive të nxitura nga temperaturat e larta dhe kushtet e thata. Një total prej 292,855 hektarësh tokë janë djegur në BE, sipas përditësimit të fundit nga Sistemi Europian i Informacionit për Zjarret në Pyje (EFFIS) më 29 korrik. Sipërfaqja totale e djegur gjatë së njëjtës periudhë të vitit të kaluar ishte 139,940 hektarë, dhe totali deri më tani këtë vit është më i lartë se mesatarja e regjistruar gjatë 19 viteve të fundit. Sistemi Evropian ka zbuluar një total prej 1,339 zjarresh më të mëdha se 30 hektarë që nga fillimi i vitit.
Shërbimi i Monitorimit të Atmosferës Copernicus thotë se disa vende kanë shënuar emetimet më të larta të zjarreve në të dhënat 23-vjeçare. Temperaturat e larta rreth Pellgut Mesdhetar gjatë verës rritën ndjeshëm mundësinë e shpërthimit të flakëve në rajon.
Modelimi ka nxjerrë në pah se zjarret rreth Mesdheut këtë verë “kanë qenë rezultat i shumë materialeve që digjen lehtë dhe kushteve të thata që nxisin intensitetin e flakëve”, tha një shkencëtar në Qendrën Evropiane për Parashikime të Motit me Afat Mesëm.
Në Mesdheun lindor, Greqia dhe Turqia përjetuan zjarre intensive me temperatura të larta të vazhdueshme që kontribuuan në përkeqësimin e situatës. Greqia ka regjistruar emetimet më të larta totale të zjarreve që nga viti 2007, dhe Turqia ka shënuar shifrat më të larta deri më sot.
Flakët kanë qenë veçanërisht intensive në Qipro, ku vendi arriti emetimet më të larta totalte vjetore në vetëm dy ditë. Kjo erdhi kryesisht për shkak të zjarreve të 22 dhe 23 korrikut, që janë përshkruar si më të këqijat në ishull në më shumë se gjysmë shekulli.
Korriku gjithashtu regjistroi një rritje të aktivitetit të flakëve në rajonin e gjerë të Ballkanit. Emetimet nga flakët në Mal të Zi dhe Maqedoninë e Veriut ishin të tretat më të larta, ndërsa ato në Serbi dhe Shqipëri ishin të dytat më të larta, pas vitit 2007.
Në Europën Jugperëndimore, zjarre të mëdha shpërthyen në Francën jugore, Katalonjë dhe Portugali në fillim të korrikut. Nga fillimi i vitit deri më 15 korrik, një total prej 3,370 zjarresh rurale kanë djegur 10,768 hektarë tokë në Portugali. Kjo shifër është tre herë më e lartë se ajo e regjistruar në të njëjtën periudhë në vitin 2024, kur u dogjën 3,462 hektarë.
