Presidentja e Komisionit Evropian, Ursula von der Leyen, ka njoftuar se do të takohet të dielën në Skoci me presidentin e SHBA-së, Donald Trump, për të diskutuar mbi marrëdhëniet tregtare transatlantike.
Lajmi u bë i ditur nga vetë Von der Leyen përmes një postimi në rrjetin social “X”, ku shkroi:
“Pas një bisede të mirë me presidentin amerikan, ramë dakord të takohemi në Skoci të dielën për të diskutuar marrëdhëniet tona tregtare dhe mënyrat për të ruajtur forcën e tyre.”
Gjatë kësaj jave, zyrtarë të Bashkimit Evropian kanë zhvilluar negociata në Uashington për një marrëveshje të mundshme që do të shmangte përshkallëzimin e luftës tarifore BE-SHBA. Raportimet e fundit sugjeronin se palët po afroheshin drejt një marrëveshjeje me një tarifë bazë 15%, por Shtëpia e Bardhë reagoi menjëherë duke i cilësuar këto si “spekulime” nëse nuk konfirmohen drejtpërdrejt nga Presidenti Trump.
Takimi i së dielës zhvillohet vetëm disa ditë para afatit të 1 gushtit, kur pritet të hyjnë në fuqi tarifat e reja prej 30%, pas përfundimit të një pauze të mëparshme të vendosur nga Uashingtoni. Ky takim shihet si një përpjekje e fundit për të zbutur tensionet tregtare mes dy blloqeve më të mëdha ekonomike në botë.
