Përplasja disa mujore për një nga tenderët më të diskutuar të këtij viti ka përfunduar me një vendim të prerë nga Komisioni i Prokurimit Publik (KPP). Ky i fundit ka urdhëruar Radio Televizionin Shqiptar (RTSH) që të shpallë fituese kompaninë “R&T” të biznesmenit Renis Tershana, duke anuluar vendimin e mëparshëm për skualifikimin e saj dhe anulimin e procedurës.
Bëhet fjalë për tenderin me objekt “Blerje shërbimi i mirëmbajtjes për Rrjetin e Shpërndarjes DVB-T2 për 48 muaj”, me një fond limit prej 907 milionë lekësh (rreth 9.1 milionë euro), i cili u shpall në mars 2025 nga drejtoresha e atëhershme e RTSH-së, Aurora Polo, në një kohë kur institucionin e përfshinin debatet për zgjedhjen e drejtuesit të ri.
Gara u zhvillua në fillim të prillit dhe në të morën pjesë tre kompani. Sipas dokumentacionit zyrtar:
Kompania T.B.S 96, në pronësi të Artan Xhorit, ofroi çmimin më të ulët: 7.6 milionë euro
Kompania R&T e Renis Tershanës ofroi: 8 milionë euro
Bashkimi i kompanive Idea Tel & Real Com ofroi: 9 milionë euro
Megjithatë, pas emërimit të Enis Vasilit në krye të RTSH-së, më 25 prill, situata ndryshoi. Vetëm tre ditë pas emërimit të saj, Komisioni i Tenderit në RTSH vendosi të skualifikojë të tre ofertuesit dhe më pas, RTSH shpalli anulimin e plotë të tenderit.
Ky vendim u ankimua nga kompania “R&T” dhe bashkimi “Idea Tel & Real Com”, duke nisur një betejë të gjatë para KPP-së, që zgjati më shumë se tre muaj.
Në këtë periudhë ndodhi edhe një tjetër ngjarje që e tronditi institucionin e KPP-së: kryetari i këtij institucioni, Jonaid Myzyri, u pezullua nga detyra dhe u mor i pandehur nga SPAK nën akuzën e shpërdorimit të detyrës.
Pavarësisht zhvillimeve, Komisioni i Prokurimit Publik vendosi që kompania “R&T” të shpallet fituese dhe urdhëroi RTSH-në të vazhdojë procedurat për lidhjen e kontratës.
Me këtë vendim, përfundon zyrtarisht një nga sagat më të bujshme të tenderëve publikë të këtij viti, ndërsa mbetet për t’u parë nëse vendimi i KPP-së do të pasohet nga zhvillime të tjera në aspektin ligjor apo administrativ./Kapitali.al
