Një denoncim alarmant ka mbërritur në redaksinë e JOQ Albania, i cili hedh dritë mbi një nga arsyet kryesore pse turistët po largohen masivisht nga bregdeti i Jugut këtë verë: çmimet absurde dhe të pajustifikueshme në restorante dhe hotele që s’e justifikojnë asnjëherë atë që ofrojnë.
Rasti konkret vjen nga restoranti dhe hoteli “Zoe Hora” në Dhërmi, ku tre vajza kanë paguar plot 750 mijë lekë të vjetra (75 mijë lekë të reja) për një drekë me vetëm 10 karkaleca dhe disa ushqime të tjera. E revoltuar, njëra prej tyre ka ndarë përvojën duke shoqëruar edhe foton e faturës, e cila flet vetë.
Në listën e produkteve bien në sy çmime marramendëse, ku 1.2 kg karkalec vjollcë kushton plot 22,000 lekë, ndërsa skampi i egër gjithashtu 22,000 lekë. Fatura totale shkon në 74,550 lekë, një shifër që ka nxitur shumë komente për abuzimin me çmimet gjatë sezonit turistik.
Në mesazhin e saj, qytetarja shprehet:
“3 vajza, 750 mijë lekë. 10 karkaleca, 560 mijë lekë. Një turp, një tmerr. Dhe në fund na thanë: ‘Ju kemi sjellë cilësi premium’. Po çfarë cilësie premium është kjo, kur ushqimi nuk e justifikon çmimin? Për ne ka qenë një zhgënjim i madh.”
Ky nuk është një rast i izoluar. Çmimet e frikshme janë bërë arsyet kryesore pse këtë verë bregdeti i jugut është boshatisur si asnjëherë më parë. Mjafton të bësh një xhiro në rrjet për të parë që dhjetëra turistë dhe pushues vendas ankohen për të njëjtën gjë: çmime marramendëse, për shërbim mediokër.
Pak ditë më parë, edhe media prestigjioze italiane Corriere della Sera publikoi një artikull ku theksonte se turistët italianë po braktisin Shqipërinë, veçanërisht jugun, për shkak të rritjes së çmimeve dhe mungesës së raportit cilësi/çmim.
Kujtojmë këtu që pronarja e restorant-hotelit “Zoe Hora” në Dhërmi, që funksionon nën ombrellën e kompanisë Coast to Coast Shpk, është Xheni Gjikuria, bashkëshortja e Florenc Gjikurisë, ku ky i fundit njihet edhe si ‘gllabërues tenderash’ dhe mik i afërt me qeverinë.
Xheni Gjikuria është themeluese dhe CEO e këtij kompleksi që përfshin shërbime hotelerie, restoranti dhe pasurish të paluajtshme. Emri i kësaj ndërmarrjeje është përfshirë edhe në investigime të JOQ Albania, ku dy vite më parë është denoncuar nga një punonjëse e kompanisë së saj mosdhënia e rrogave për dy muaj dhe administrimi “me dy bilance”, ku një pjesë e pagës u jepej në cash.
Për më tepër, janë diskutuar tërheqje fonde nga Bashkimi Europian për përmirësime strukturore në Dhërmi, nëpërmjet kompanisë së Gjikurisë. Kjo gjë ka ngjallur dyshime të forta në lidhje me abuzimet dhe vjedhjet që janë kryer me fondet e BE për bujqësinë në Shqipëri, me bekimin e ish-ministres, Frida Krifca.
