Ish-kryeministri Sali Berisha u paraqit sot në SPAK në zbatim të masës detyrim paraqitje, hodhi akuza të forta ndaj kreut të SPAK Altin Dumani dhe gjyqtares Irena Gjoka.
Berisha tha se se Altin Dumani mbajti në xhep për javë të tëra mandatin e arrestit të kreut të kartelit Troplini, duke u bërë kështu anëtar i organizatës.
Ndërsa për gjyqtaren Irena Gjoka tha se është mashtruese ordinere.
“Po lexoj deklaratën që unë lashë për kreun e SKAP-it, Altin Troplini. Pasi mbajti në xhep për javë të tëra mandatin e arrestit të kreut të kartelit Troplini, duke u bërë kështu anëtar i organizatës Altin Troplini, hapi dosje për Irenën me 5 mbiemra, pa emër. Ka hapur çështje penale pa emër, ky është një krim, një abuzim i madh me drejtësinë. Irena me 3 apo 5 mbiemra është një delikuente e cila ka vendin, jo në drejtësi, por atje ku e meriton. Altin Troplini me urdhër të Ramës, bën çdo gjë ti zgjasë kësaj qenie delikuente qëndrimin në sistem, duke u bërë bashkë me Altinin fytyra e vërtetë e sistemit. Irena me 3 mbiemra, është mashtruese ordinere, është shkarkuar në 1996 për korrupsion nga Këshilli i Lartë i Drejtësisë dhe këtë ua ka mohuar avokatëve të mi. Irena me 3 mbiemra, që mbrohet me të gjitha mënyrat nga altin Troplini, është një delikuente e cila ka mashtruar në formularët”, tha Berisha.
Berisha tha se në ditët e fundit në SPAK ka ndodhur një përplasje fizike mes Dumanit dhe një prej gjykatëseve speciale, pasi kjo e fundit nuk i ka zbatuar urdhrat e tij.
Sipas Berishës, Dumani i ka shkuar në zyrë dhe i ka marrë kompjuterin për ta terrorizuar, teksa shtoi se do të vijojë hetimet për rastin për të kuptuar se kush është gjyqtarja në fjalë.
“Thuhet se këto ditë, vetëm sa nuk është përleshur fizikisht me një gjykatëse, që nuk ia ka zbatuar urdhrat. Ka shkuar ia ka rrëmbyer kompjuterin për ta terrorizuar. Këtu ka akte, ka skena, ka përçudnime. Këto që them unë nuk kanë të bëjnë me gjykatësit si persona, kanë të bëjnë me sistemin, i cili nuk mund të jetë kurrë i tillë. Gjykatësi duhet të jetë i lirë për të bërë detyrën.
Nuk mundet kurrë që gjykatësi që shqyrton dosjet e Altin Troplinit, të kontrollohet nga Altin Troplini. Ka patur një gjë të rëndë aty brenda, por thuhet që aty për shkak të refuzimit të njërit prej anëtarëve të Gjykatës Speciale, ka shkuar puna te rrëmbimi i kompjuterit”, tha Berisha nga SPAK, ku u paraqit për masën e sigurisë “detyrim paraqitje”.
