Gjykata e Dibrës ka caktuar masën e sigurisë “arrest në burg” për Petrit Çakrrin dhe Fatjon Bushgjokën, të akuzuar për rrëmbimin dhe vrasjen e 23-vjeçarit Renis Dobra. Trupi i pajetë i të riut u gjet më 9 korrik pranë liqenit të Shkopetit, ndërsa ngjarja dyshohet të ketë ndodhur një ditë më parë, më 8 korrik 2025.
Nga hetimet e deritanishme dhe pamjet filmike, policia ka identifikuar si të përfshirë në ngjarje edhe Aleksandër Bushgjokën dhe Kristi Bushgjokën, të cilët janë shpallur në kërkim. Dyshohet se ata kanë kaluar kufirin drejt Kosovës menjëherë pas krimit. Konkretisht, Aleksandër Bushgjoka ka dalë nga territori shqiptar përmes pikës kufitare me Kosovën më 9 korrik, përpara se të shpallej në kërkim, ndërsa për Kristi Bushgjokën ka dyshime të forta se është strehuar po në Kosovë.
Petrit Çakrri u arrestua disa ditë pas ngjarjes, në hyrje të Tropojës.
Pista kryesore e hetimit mbetet një konflikt për drogë të ndodhur në Gjermani mes viktimës dhe vëllezërve Bushgjoka. Megjithatë, nuk përjashtohet mundësia që vrasja të jetë kryer me porosi nga persona të tretë, të përfshirë në trafikimin e lëndëve narkotike.
