Vllaznia mban lart “flamurin kuqezi” deri më tani në Evropë. Shkodranët kaluan në fazën e dytë kualifikuese të Conference League, pasi mposhtën Daugavpils.
Ndërkohë që Partizani u eliminua nga Conference League pas humbjes me Kalju në “Air Albania”. Egnatia në krahun tjetër dështoi në Champions League dhe do të luajë në fazën e dytë të Ligës së Konferencës përballë Dinamo Minsk.
Në një intervistë të dhënë për “News24”, trajneri i mirënjohur, Shpëtim Duro ka bërë një analizë të thellë për ekipet shqiptare në arenën ndërkombëtare, duke përmendur edhe Dinamon që luan në fazën e dytë të Conference League me Atletic Escaldes.
Evropa pasqyra e vërtetë e nivelit të futbollit tonë? Eufori qysh në momentin e hedhjes së shortit. Shikoj deklarata të papërgjegjshme, që tentojnë që në momentin e parë, të kalojnë fazën e grupeve. Sido që të jetë, ne jemi skuadra shqiptare. Ne duhet të ngjitemi shkallë-shkallë.
Eliminimi i Egnatias? Nuk e prisja. Egnatia nuk po bën hapin e duhur në Europë, në 3 pjesëmarrje, është eleminuar që në turin e parë. Gjithsesi, ka fat, shpresoj që në Conference League të rikuperojë.
Pashë momente euforie te Egnatia pas ndeshjes së parë. Nuk e kanë marrë seriozisht rivalin, edhe interpretimi në pjesën e parë linte shumë për të dëshiruar. Egnatia nuk e meritonte atë rezultat. Të shikojmë në vijim.
Ky ishte momenti euforik, pasi menduan se fituan këtu. Egnatia është më lart në nivelin financiar. Është skuadër që para dy sezonesh kaloi në fazën e grupeve në Conference League, ndërsa Egnatia nuk e ka atë eksperiencë.
Eliminimi i Partizanit, çfarë bënë keq të kuqtë? Edhe në ndeshjen e parë, dominoi rivali. Edhe në ndeshjen e kthimit, Kalju përdori strategji të caktuara, u mbrojt dhe shfrytëzoi atë momentin e duhur.
Partizani nuk bëri para spektatorëve të vet atë lojë. Kundërshtari, thashë, një rival që është në vendin e katërt në Estoni, të eleminojë Partizanin, është një goditje e rëndë. Kjo është goditje e rëndë për të gjithë. Kjo është që duhet t’i kalojnë shkallë-shkallë turet.
Vllaznia avancon – Vllaznia ka ekip të mirë, reagoi mirë dje, kualifikimi ishte detyrim ndaj një rivali modest. Vllaznia e bëri detyrën, tani testi i vërtetë është Vikinguri i Islandës. Vikinguri është fotokopje e Breidablik. Janë ekipe kompakte, janë ekipe që nuk kanë investime të mëdha, por i përgatisin mirë ndeshjet.
Dinamo e nis nga turi i dytë Ligën e Konferencës – Besoj se Dinamo ka nxjerrë mësime, besoj se do e vlerësoi në maksimum, ka edhe teknikun me përvojë, kjo ka shumë rëndësi. Them se Dinamo do e kalojë turin./News24
