Televizioni “Abc News”, ku drejtor është Sokol Balla, e ka trajtuar lajmin e refuzimit të kryebashkiakut të Konispolit, Erges Dule ndaj kërkesa të Edi Ramës për shkarkimin e drejtorëve, nënkryetarëve dhe kryetarëve të njësive administrative, në një mënyrë që ka ngjallur reagime në rrjet kundër tij.
Ai e ka trajtuar Konispolin si një territor grek që flet greqisht, duke i vënë lajmin titullin “KONISPOLI, RAMA OQI!”, duke përdorur fjalën “oqi” në vend të “JO-së” shqipe.
Konispoli është një territor me shumicë shqiptare dhe kryebashkiaku çdo deklaratë dhe reagim e ka shqip, por nuk dihet se çfarë ka pasur në mendje Sokol Balla me këtë titull anti-shqiptar.
Lidhur me këtë skandal ka reaguar edhe anëtarja e Këshillit Bashkiak të Konispolit, Sildi Koqini, e cila e konsideron si një gabim serioz, një lajthitje të pajustifikueshme që bie ndesh me çdo normë të komunikimit publik dhe etikës profesionale të gazetarisë.
Sipas saj, përdorimi i fjalës “OQI” krijon konfuzion të rrezikshëm dhe në kontekstin e ndjeshmërisë kombëtare, nënkupton një përpjekje të pakuptimtë ose të qëllimëm për të shtrembëruar identitetin gjuhësor dhe kombëtar të Konispolit.
Koqini thotë se Konispoli ka qenë dhe do të mbetet pjesë e pandashme e identitetit kombëtar shqiptar, në gjuhë, histori dhe ndërgjegje. Sipas saj, çdo tentativë për të krijuar mjegull rreth këtij identiteti qoftë edhe nga një gabim teknik përbën një provokim të rëndë për banorët e Konispolit dhe për të gjithë shqiptarët e Çamërisë.
Reagimi i plotë:
Me indinjatë të thellë kam ndjekur një pasqyrim të papranueshëm mediatik nga televizioni ABC News, i cili në edicionin e tij informativ ka shfaqur në ekranin kryesor titullin:
“KONISPOLI: RAMA, OQI!”
Ky është një gabim serioz, një lajthitje e pajustifikueshme që bie ndesh me çdo normë të komunikimit publik dhe etikës profesionale të gazetarisë.
Përdorimi i fjalës “OQI” gjoja nga goja e kryetarit të Bashkisë Konispol krijon konfuzion të rrezikshëm dhe në kontekstin e ndjeshmërisë kombëtare, nënkupton një përpjekje të pakuptimtë ose të qëllimëm për të shtrembëruar identitetin gjuhësor dhe kombëtar të Konispolit.
Dua të theksoj me forcë se:
Konispoli është shqiptar. Ka qenë dhe do të mbetet pjesë e pandashme e identitetit kombëtar shqiptar, në gjuhë, histori dhe ndërgjegje.
Çdo tentativë për të krijuar mjegull rreth këtij identiteti qoftë edhe nga një gabim teknik përbën një provokim të rëndë për banorët e Konispolit dhe për të gjithë shqiptarët e Çamërisë.
Si anëtare e Këshillit Bashkiak të Konispolit, kërkoj:
1. Korrigjimin e menjëhershëm të këtij titulli nga ana e redaksisë së ABC News.
2. Një ndjesë publike për këtë lapsus të rëndë që ka cenuar ndjeshmërinë e një komuniteti të tërë.
3. Respekt për të vërtetat historike dhe identitare, që janë baza e bashkëjetesës dhe informimit të drejtë në një shtet demokratik.
Konispoli është tokë shqiptare, me gjuhë shqipe dhe qëndresë shqiptare.
