Shumë afër qendrës së Tiranës, pranë shinave të trenit, zonja Ramazane Mërzheku ankohet për një problem jetik, ajo ‘noton’ e jeton mbi ujërat e zeza.
Brenda në oborrin e shtëpisë së saj ka gropën septike të ujërave të zeza edhe të tri familjeve të tjera. Ajo prej vitesh kërkon që shkarkimi i tyre të bëhet në tubacionin kryesor dhe jo në oborrin e saj. Por që të bëhet e mundur kjo gjë kërkon një financim që të mund të shtrihen tubacionet e çdo familjeve deri në derdhjen përfundimtare në tubin kryesor.
Ajo tregon për emisionin “Fiks Fare” se për 15 vjet i është drejtuar me kërkesa të vazhdueshme Ujësjellës Kanalizimeve të Tiranës, Njësisë Administrative Nr 11 në kryeqytet, Institutit të Shëndetit Publik, ish Inspektoratit Urbanistik Kombëtar dhe Bashkisë së Tiranës, për zgjidhjen e problemit të ujërave të zeza.
Ish-kryeinspektori i INUK-ut ia kalonte për kompetencë IMT-së së kryeqytetit heqjen e gardheve të banorëve që pengonin kalimin e linjës së shkarkimit të ujërave të zeza në tubacionin qendror. Edhe pse bashkia investoi në atë zonë, 4 banesa u lanë jashtë këtij investimi dhe këto banesa sot janë ende me gropa septike.
Njësia Administrative Nr 11 në kërkesat që i ka çuar Drejtorisë së Përgjithshme të Punëve Publike kërkon marrjen e masave me infrastrukturën e duhur të rrugëve në këtë zonë, pasi përveç ujërave të zeza problem tjetër është mosaksesimi i zjarrfikëses apo ambulancës në brendësi të zonës.
Instituti i Shëndetit Publik në një relacion që i ka drejtuar Ujësjellës Kanalizimeve Tiranë ka konstatuar se ujërat e zeza në banesën e zonjës Mërzheku janë një vatër me risk të përhapjes së sëmundjeve infektive dhe kërkon marrjen e masave për kthimin e kushteve higjeno-sanitare në normalitet.
Në fund të këtyre letërkëmbimeve Drejtoria e Planifikimeve Publike në Bashkinë e Tiranës ka thënë se nuk ka parashikuar investim në këtë zonë dhe ia adreson zgjidhjen e problemit Drejtorisë së Ujësjellës Kanalizimeve të Tiranës.
UKT-ja përsëri sqaron se është i pamundur hartimi dhe miratimi i një projekti për shkarkimin e ujërave të ndotura të banesës së zonjës Ramazane në tubacionin kryesor, për shkak të kuotave.
UKT u sugjeron këtyre banorëve që të vazhdojnë me gropa septike, deri në një investim të ri për gjithë këtë zonë, e cili është në vëmendjen e UKT-së në të ardhmen. Por deri atëherë nuk dihet edhe sa vite të tjera do kalojnë për Ramazanen në bashkëjetesë me ujërat e zeza në oborr./TCH
