Të paktën 12 persona janë vrarë nga sulmet ajrore izraelite në Luginën Bekaa të Libanit lindor, bëri të ditur guvernatori i rajonit Baalbek-Hermel, Bachir Khodr.
Sipas tij, shtatë nga viktimat janë shtetas sirianë, përfshirë një familje pesëanëtarëshe, ndërsa tre të tjerë janë libanezë. Dy persona të tjerë humbën jetën në zonën Shmustar.
BBC rapoeron se ushtria izraelite deklaroi se ka goditur disa objekte ushtarake të grupit të armatosur Hezbollah, përfshirë kampe stërvitore të njësisë elitë të tij, të njohur si Forca Radwan.
Këto janë sulmet më të rënda që prej armëpushimit të nëntorit të kaluar, i cili i dha fund një viti përplasjesh mes Izraelit dhe Hezbollahut, duke përfshirë dy muaj lufte të hapur që e goditi rëndë grupin libanez.
Hezbollah ende nuk ka dhënë një deklaratë zyrtare për sulmet, por televizioni i tij, Al-Manar, i cilësoi ato si shkelje të armëpushimit dhe të sovranitetit të Libanit.
Zëdhënësi në gjuhën arabe i Forcave të Mbrojtjes së Izraelit (IDF), kolonel Avichay Adraee, tha se sulmet e së martës kishin në shënjestër baza të Forcës Radwan dhe depo me armatime që Hezbollah përdor për aktivitetet e tij ushtarake.
IDF theksoi gjithashtu se në shtator të vitit 2024 kishte vrarë disa komandantë të kësaj njësie elitare dhe se që atëherë Hezbollah po përpiqet të rindërtojë kapacitetet e saj ushtarake.
Ministri izraelit i Mbrojtjes, Israel Katz, deklaroi se këto sulme dërgojnë një “mesazh të qartë” si për Hezbollahun, ashtu edhe për qeverinë libaneze, duke paralajmëruar se Izraeli është i gatshëm të përgjigjet me “forcë maksimale” ndaj çdo përpjekjeje për rikthimin e kapaciteteve ushtarake të këtij grupi.
Bazë e armëpushimit të arritur në nëntor mes Izraelit dhe Libanit, me ndërmjetësimin e SHBA-së, është zbatimi i plotë i Rezolutës 1701 të Këshillit të Sigurimit të OKB-së, që i dha fund luftës së vitit 2006. Marrëveshja parashikon tërheqjen e Hezbollahut në veri të lumit Litani, ndërsa në jug të Libanit të mbeten vetëm ushtria libaneze dhe trupat paqeruajtëse të OKB-së.
Nga ana tjetër, edhe Izraeli duhet të tërheqë forcat e tij nga territori libanez, por ende ruan praninë në pesë pika strategjike në jug të Libanit, të cilat i konsideron të rëndësishme për sigurinë
