Instituti i Psikiatrisë Forenzike në Kosovë ka përfunduar ekzaminimin e Naim Murselit, i akuzuar për organizimin e vrasjes së bashkëshortes së tij, Liridona Ademaj. Sipas raportit të siguruar nga mediat, Murseli nuk vuan nga asnjë çrregullim apo sëmundje mendore.
“Tek i ekzaminuari Naim Murseli nuk është konstatuar ndonjë çrregullim mendor apo sëmundje mendore e karakterit të përkohshëm apo përhershëm”, thuhet në dokumentin zyrtar.
Gjatë ekzaminimit, Murseli ka rrëfyer përvojat traumatike që ka pasur në fëmijëri, duke përmendur dhunën nga i ati dhe problemet familjare që kanë ndikuar në jetën e tij. Ai përmendi edhe ndërhyrje në zemër dhe dha detaje për natën e krimit dhe rolin e dy bashkëpunëtorëve, Kushtrim Kokalla dhe Granit Plava.
Seanca e radhës për këtë rast pritet të zhvillohet të hënën, më 14 korrik. Familjarët e viktimës kërkojnë dënimin maksimal për Murselin.
Liridona Ademaj u vra më 29 nëntor 2023 në Prishtinë. Fillimisht rasti u raportua si një grabitje, por më pas Prokuroria zbuloi se vrasja ishte e planifikuar nga vetë bashkëshorti i saj.
Përveç Naim Murselit, në këtë çështje janë të akuzuar edhe Kokalla, Plava dhe një person tjetër, i cili është dënuar me 5 vite burg për shitjen e armës së vrasjes. Prokuroria e Prishtinës deklaron se Murseli ka organizuar të gjithë ngjarjen, ndërsa Kokalla dhe Plava janë ekzekutorët e drejtpërdrejtë.
