Kryeministri britanik Keir Starmer dhe Presidenti francez Emmanuel Macron janë në përgatitje të një telefonate me vendet e “koalicionit të gatshëm” për të diskutuar një mision të mundshëm paqeruajtës që do të ndihmojë në frenimin e agresionit rus ndaj Ukrainës.
Në një deklaratë të përbashkët, Starmer theksoi se Vladimir Putin “i ka kthyer shpinën armëpushimit”, duke e cilësuar sjelljen e tij si “krejtësisht barbare”. Ai kujtoi se janë bërë katër muaj që kur Ukraina ka pranuar një armëpushim të plotë dhe pa kushte, duke vlerësuar lidershipin e Presidentit Zelenskyy.
Sipas kryeministrit britanik, koalicioni ndërkombëtar duhet të zhvendosë fokusin nga thjesht përgatitja për paqe, në veprime konkrete për ta arritur atë: “Kjo do të thotë ta detyrosh Putinin të ulet në tryezë”, tha ai.
Ndërkohë, edhe Presidenti Macron bëri thirrje për intensifikim të përpjekjeve, duke theksuar se “duhet bërë çdo gjë e mundshme që Ukraina të mund t’i rezistojë Rusisë”, ndërsa për çështjen e armëpushimit ai tha se “këtu duhet diçka e re”.
Iniciativa vjen në një moment kyç të luftës, kur përballja në front mbetet e ashpër dhe përpjekjet diplomatike për paqe janë gjithnjë e më të komplikuara.
