Eurodeputeti Fredi Beleri ka ngritur alarmin në Parlamentin Europian mbi gjendjen në Shqipëri, duke e cilësuar raportin e Komisionit Europian për vitet 2023-2024 si të zbukuruar dhe larg realitetit. Në fjalën e tij në seancën plenare, përfaqësuesi i Demokracisë së Re dhe Partisë Popullore Evropiane listoi disa shqetësime kryesore që sipas tij tregojnë për një regres demokratik në vend.
“Së pari, regjistrimi i popullsisë u vu në pikëpyetje nga tetë prej nëntë pakicave kombëtare për metodologjinë dhe rezultatet,” deklaroi Beleri. Ai kritikoi edhe reformën në drejtësi, duke e quajtur të dështuar për shkak të ndërhyrjeve të qeverisë shqiptare. “Pak orë më parë, ambasadori i BE-së denoncoi një tjetër ndërhyrje nga kryeministri shqiptar,” shtoi ai.
Në lidhje me proceset zgjedhore, Beleri iu referua raporteve të OSBE/ODIHR dhe Parlamentit Europian, të cilat sipas tij evidentuan presion mbi votuesit, manipulim të medias, ndërhyrje nga krimi i organizuar dhe financime të dyshimta. Ai theksoi gjithashtu problematikën e pronave, ku vetëm 50% janë kthyer tek pronarët legjitimë, ndërsa në zonat me minoritet grek kjo shifër është vetëm 20%.
Më tej, eurodeputeti denoncoi edhe gjendjen ekonomike dhe financiare, duke përmendur deklaratën e Guvernatorit të Bankës së Shqipërisë se rreth 4 miliardë euro qarkullojnë jashtë sistemit bankar në një vend me PBB vetëm 27 miliardë euro.
