Skuadra e Egnatias kthehet nesër në fushën e lojës në aktivitete zyrtare duke marrë pjesë për të dytin vit radhazi në Ligën e Kampioneve.
Rrogozhinasit përballen me ekipin islandez të Breidablik dhe do të mundohen të bëjnë realitet objektivin e kalimit të turit në këtë kompeticion.
Nuk do të jetë një detyrë e lehtë, siç theksoi në një prononcim në vigjilje të ndeshjes trajneri Edlir Tetova, i cili kujtoi se në një turne të tillë, marrin pjesë ekipet më të mira të vendeve të ndryshme.
“Nuk ka ekip modest na Champions League. Është Champions League, sigurisht marrin pjesë më të mirat”, theksoi ai fillimisht.
Për Tetovën ishte i rëndësishëm fakti se faza përgatitore ka kaluar mirë, pa probleme dëmtimesh, teksa shtoi se do të kishte të gatshëm për ndeshjen edhe sulmuesin Bakajoko.
“Mendoj se përgatitjet kanë shkuar shumë mirë. Them shumë mirë, pasi në përgatitje gjithmonë nuk duhet të kesh lëndime, dhe ne lëndime nuk kemi pasur. Përveç Bakajkos, i cili është kthyer në grup gjithsesi dhe do të jetë i gatshëm”, theksoi trajneri i rrogozhinasve.
