Flakët kanë përfshirë një sipërfaqe të konsiderueshme pyjesh në zonën malore midis fshatrave Dome dhe Pogaj, duke shkaktuar dëme të mëdha në mjedis.
Përhapja e zjarrit po favorizohet nga temperaturat ekstreme dhe era e fortë që fryn në zonë.
Forcat zjarrfikëse të Hasit, në bashkëpunim me emergjencën civile, po punojnë intensivisht në terren për të kontrolluar zjarrin, megjithë vështirësitë që paraqet terreni i thyer malor, i cili pengon përdorimin e mjeteve zjarrfikëse.
Operacioni po zhvillohet vetëm në këmbë, me përpjekje të vazhdueshme për të izoluar vatrat e zjarrit dhe për të parandaluar përhapjen e tij më tej.
Autoritetet apelojnë për kujdes maksimal në këtë periudhë me rreziqe të larta zjarri.
